៥ គេហទំព័រសម្រាប់រៀន IT Online ដោយឥតគិតថ្លៃ
ព័ត៌មានវិទ្យា ឫ Information Technology(IT) គឺជាជំនាញមួយដ៏ពេញនិយម និងគួរជាទីចាប់អារម្មណ៍សម្រាប់សិស្ស និស្សិតរបស់កម្ពុជា ។ និស្សិតផ្នែកនេះភាគច្រើន តែងតែមានបំណងចង់បន្តការសិក្សាទៅបរទេសដូចជា ប្រទេសឥណ្ឌាជាដើម ប៉ុន្តែវាទាមទារឲ្យយើងមានសមត្ថភាពខ្ពស់ រួមផ្សំនឹងផលវិបាកជាច្រើន ដូចជាបន្លាស់ប្តូរមជ្ឈដ្ឋានរស់នៅ មិត្តភក្តិបងប្អូន ច្បាប់ទម្លាប់ របបអាហារជាដើម ។ ចុះប្រសិនបើយើងអាចសិក្សា Online មិនចាំបាច់ឃ្លាតពីគ្រួសារ ជួបជុំមិត្តភក្តិជាធម្មតា និងសិក្សាដោយមិនចាំបាច់ចំណាយថ្លៃវគ្គសិក្សា តើយើងគួរពិចារណាដែរឫទេ? ថ្ងៃនេះ សំបុកអាយធី សូមលើកយក គេហទំព័រចំនួនប្រាំផ្សេងគ្នា ដែលអនុញ្ញាតឲ្យលោកអ្នកធ្វើការសិក្សាជំនាញព័ត៌មានវិទ្យាតាម online និងឥតគិតថ្លៃ ។
គេហទំព័រទីមួយ និងល្បីល្បាញជាងគេ នោះគឺ www.edx.org
EdX គឺជាគេហទំព័រដែលបង្កើតឡើងរួមគ្នាដោយសាកលវិទ្យាល័យ Harvard និងវិទ្យាស្ថាន MIT ។ ក្នងគេហទំព័រនេះមានមុខវិជ្ជាជាច្រើនដូចជា law, history, engineering, business, computer science, public health ដែលសហការរួមគ្នាដោយសាកលវិទ្យាល័យប្រមាណ ២៨ សាកលវិទ្យាល័យ ។ សម្រាប់វគ្គសិក្សាថ្មីថ្នាក់ Introduction to Computer Science គឺនឹងចាប់ផ្តើមនៅថ្ងៃទី ០១ ខែមករា ឆ្នាំ ២០១៤ និងថ្នាក់ Foundations of Computer Graphics នៅថ្ងៃទី ០៧ ខែតុលា ឆ្នាំ២០១៣ នេះហើយ ។
គេហទំព័រទីពីរ គឺ www.coursera.org
មិនខុសពី EdX ឡើយ Coursera គឺជាគេហទំព័រដែលបង្កើតឡើងក្នុងគោលបំណងជួយដល់សិស្ស និស្សិតទូទាំងសកលលោក ដើម្បីពង្រីក និងពង្រឹងចំណេះដឹងរបស់ខ្លួនតាមរយៈ Internet។ គេហទំព័រនេះ មានសាកលវិទ្យាល័យប្រមាណ ៧៦ ផ្សេងគ្នាជាដៃគូ ជាមួយនឹងមុខវិជ្ជាប្រមាណ ៤៣៤ មុខសម្រាប់ជ្រើសរើស។ សម្រាប់វគ្គសិក្សាថ្មី ថ្នាក់Programming Languages ដែលផ្តល់ដោយ University of Washington នឹងចាប់ផ្តើមនៅថ្ងៃទី ០៣ ខែតុលា ឆ្នាំ២០១៣នេះហើយ ។
គេហទំព័រទីបី គឺ www.alison.com
ALISON ឫ Advance Learning Interactive Systems Online គឺជាគេហទំព័រមួយផ្សេងទៀតដែលផ្តល់នូវមុខវិជ្ជា ប្រមាណ ៥៥៩ មុខ ដែលចែកជា ១០ ផ្នែកផ្សេងៗគ្នា ។ នៅទីនេះមិនមានកំណត់ថ្ងៃចូលរៀន ដូចគេហទំព័រខាងលើទេ។ លោកអ្នកនឹងសិក្សាជាមួយវីដេអូដែលបានថតទុក និងមានកិច្ចការស្រាវជ្រាវ (Assignment) នៅចុងបញ្ចប់នៃវគ្គនីមួយៗ ។
គេហទំព័រទីបួន គឺ www.udacity.com
Udacity ត្រូវបានបង្កើតឡើងដោយ និស្សិតសាកលវិទ្យាល័យ Stanford គឺលោក Sebastian Thrun និងលោក Peter Norvig នៅពេលដែលពួកគាត់បានបើកថ្នាក់ Introduction to Artificial Intelligence តាម online ដោយមិនគិតប្រាក់ ។ មុខវិជ្ជានៅក្នុង Udacity ត្រូវបានចែកចេញជា ៥ ផ្នែក និង ៣ កម្រិត ។ នៅទីនេះ មានវីដេអូមេរៀន, forum, លំហាត់ មិនចាញ់គេហទំព័រទាំងបីខាងលើនោះទេ ។
គេហទំព័រទីប្រាំ គឺ www.open2study.com
គ្រាន់តែឭឈ្មោះក៏អាចដឹងថា គេហទំព័រនេះជាកន្លែងបើកទូលាយសម្រាប់អ្នកសិក្សារៀនសូត្រដែរ ។ នៅទីនេះមុខវិជ្ជាសិក្សាត្រូវបានបែងចែកជា ៨ ផ្នែកផ្សេងគ្នា ។ វគ្គសិក្សាថ្មី ថ្នាក់ Writing for the Web និងថ្នាក់ Concepts in Game Development នឹងចាប់ផ្តើមនៅថ្ងៃទី ០៩ ខែកញ្ញា ឆ្នាំ២០១៣ នេះ ។
ជាការពិតណាស់ ការសិក្សាត្រូវការ ការខិតខំព្យាយាម គួបផ្សំនឹងការសិក្សា online បែបនេះផងនោះ រឹតតែតម្រូវឲ្យមានការខិតខំប្រឹងប្រែងទ្វេដង ។ សំបុកអាយធី ជួយបានត្រឹមប៉ុណ្ណេះទេ រឿងបន្តបន្ទាប់ គឺត្រូវមើលថា លោកអ្នកប្រឹងប្រែងដល់កម្រិតណា ហើយ 
No comments:
Post a Comment